Akizungumza katika mahojiano maalum, Liewig raia wa Ufaransa aliuambia mtandao huu kwamba, kikosi chake kilicheza vizuri lakini Yanga walitumia vizuri nafasi walizopata.
“Tulicheza vizuri kuanzia mwanzo hadi mwisho wa mchezo tatizo nafasi tulizopata hatukuzitumia vizuri na badala yake wenzetu Yanga walicheza vizuri na kutumia nafasi walizopata,” anasema Liewig.
Kocha huyo hata hivyo alisema anaamini kikosi chake kinachoundwa na wachezaji wengi vijana na wale waliokuwa hawapati nafasi kikosi cha kwanza, bado kina nguvu ya kufanya vizuri msimu ujao wa ligi na hata katika michuano ya Klabu Bingwa Afrika Mashariki na Kati ‘Kombe la Kagame’.
Liewig alitaja mambo makubwa manne yaliyoikwaza timu yake na kuruhusu kufungwa mabao 2-0 na Yanga;
SAIKOLOJIA;
“Kabla ya kuingia uwanjani si wachezaji tu hata mashabiki wetu wengi walijua timu yetu itafungwa, sasa kazi kubwa ilikuwa kuwaweka sawa wachezaji wetu hasa vijana katika hali ya kuhakikisha tunashinda mechi hii.
“Wakati sisi tukiwaza hivyo, wenzetu Yanga walikuwa wana uhakika wa ushindi na mbaya zaidi walikuwa wanawaza kuibuka na ushindi wa mabao mengi zaidi wakidhani kikosi chetu ni dhaifu,” anasema Liewig.
Liewig anakiri kwamba, pamoja na yote hayo lakini benchi la ufundi la Simba lilijitahidi kuwaweka sawa kisaikolojia lakini timu zilipoingia uwanjani ni wazi Yanga ilikuwa vizuri kisaikolojia katika ushindi kuliko wao.
PENALTI YA MUDDE;
Simba ilipata penalti dakika ya 28 baada ya beki wa Yanga, Nadir
Haroub ‘Cannavaro’ kumuangusha ndani ya eneo la hatari aliyekuwa mshambuliaji wa Simba, Mrisho Ngassa. Penalti hiyo ilipigwa na Mussa Mudde raia wa Uganda, lakini alikosa.
“Hadi tunapata penalti, Yanga walikuwa mbele kwa bao 1-0, hivyo kama tungepata penalti ile matokeo yangekuwa sawa na kuhamsha morali yetu ya kuhakikisha tunapata matokeo mazuri.
“Siku zote anayepiga penalti huwapa mashabiki uhakika wa kupata kwa asilimia kubwa, lakini Mudde amekosa na lile halikuwa lengo lake japokuwa umakini wa hali ya juu ulitakiwa kuwepo,” anasema Liewig.
KULINDA LANGO;
Liewig anasema kwa muda mwingi viungo na hata washambuliaji wake walikuwa wakilinda lango badala ya kushambulia kutokana na kasi ya Yanga hivyo kupoteza lengo la kupata ushindi mapema.
“Kama tungetangulia kupata bao mambo yangekuwa mazuri lakini muda mwingi wachezaji wangu walikuwa wakilinda lango kutokana na Yanga walivyokuwa wanashambulia.
“Mchezo huu wa kulinda ungekuwa mzuri kwetu endapo tungekuwa tunaongoza angalau kwa bao moja, sasa tulikuwa nyuma kwa bao moja muda mrefu halafu bado tukawa tunalinda lango, hapo unaona jinsi gani kwamba hata wachezaji wenyewe walikuwa bado na tatizo la saikolojia kwa kudhani Yanga inaweza kuwafunga mabao mengi zaidi,” anasema Liewig.
UBINGWA WA YANGA;
Tofauti na mechi nyingine za watani wa jadi zinavyokuwa, mara nyingi Simba na Yanga hukutana katika mechi za mwisho tena kwa kuwania pointi muhimu lakini katika mechi ya wikiendi iliyopita, mambo yalikuwa tofauti na hata Liewig ameliona hilo.
“Yanga ilikuwa tayari bingwa, sisi tulikuwa na uhakika wa nafasi ya
tatu huku tukiwa hatuwezi kupata nafasi ya pili kwa vyovyote hata kama tungeshinda. Hii ina maana Yanga, ilicheza kwa kujiamini zaidi huku ikitaka ushindi tu ili iweze kupewa kombe kwa furaha.
“Sisi tulitaka kucheza kwa kuweka heshima mbele ya mashabiki wetu huku tukipingana na makelele ya kufungwa mabao mengi na Yanga. Hili lilikuwa tatizo dogo japokuwa lilionekana kubwa baadaye,” anasema Liewig.
ANAZUNGUMZIAJE MUSTAKABALI WAKE…………….?
Liewig ambaye alijiunga na Simba Januari mwaka huu, anasema baada ya kipigo cha mabao 2-0 kutoka kwa Yanga huku akiwa na msimamo wa kuendelea kutowatumia wakongwe, hajui mustakabali wa kazi yake utakuaje.
Kocha huyo muda mfupi baada ya kutua Simba, alihakikisha kikosi
kinakuwa na nidhamu na mchezaji aliyeona anaharibu nidhamu kikosini alimtimua. Katika ‘timuatimua’ yake, Liewig aliwasimamisha wachezaji Haruna Moshi ‘Boban’, Amir Maftah, Juma Nyosso, Felix Sunzu, Mwinyi Kazimoto, Paul Ngalema na Abdallah Juma, lakini baadaye aliwasamehe Kazimoto na Sunzu.
Uamuzi huu wa Liewig uliigawa Simba kwani si mashabiki tu hata
viongozi wapo waliomuunga mkono na wengine walipinga uamuzi wake huo wa ‘kuwatimua’ kikosini kina Boban.
“Uamuzi huu ulikuwa mzuri kwa manufaa ya Simba na ni mapema kuona uzuri wa uamuzi wangu lakini baada ya muda mtaelewa kwa nini nilifanya vile. Bado nina imani na wachezaji vijana ninaowatumia na hata akija kocha mwingine mambo yatakuwa vizuri kwao,” anasema Liewig.
“Kila msimu unapoisha, viongozi wa timu huketi pamoja na kufanya tathmini yao sasa siwezi kukuambia kama majaliwa yangu yatakuaje ndani ya Simba lakini uongozi wenyewe ndiyo utakaojua nini cha kufanya mimi naheshimu mkataba wangu hapa,” anamaliza Liewig.
Post a Comment